Нэг насны хөдөлмөр зүтгэлээ төр засагтаа үнэлүүлнэ гэдэг юутай сайхан. Газар тариалангийн салбарт 38 дахь жилдээ ажиллаж байгаа өрхийн тариаланч Гомбосүрэнгийн Нямцэцэг сар шинийн босгон дээр “Улсын аварга тариаланч” цол, тэмдгээр шагнууллаа.

1986 онд Улаантолгойн сангийн аж ахуйн нарийн ногооны 4-р бригадад ногоочноор ажил хөдөлмөрийн гараагаа эхлүүлж байсан бол өдгөө аймаг, орон нутгийнхаа иргэдийг эрүүл хүнсний ногоогоор хангасан “Улсын аварга тариаланч” боллоо.

Хаврын тариалалтаас эхлээд намрын анхны цас унах хүртэл гадаа талбайд тасралтгүй хөдөлмөр өрнөнө. Нямцэцэг аварга 10 хүнийг байнгын болон түр ажлын байраар хангадаг.

Мөдхөн эхлэх хаврын тариалалтын бэлтгэлээ бүрэн базаахын зэрэгцээ үйл ажиллагаагаа өргөжүүлэх чиглэлээр олон зүйлийг төлөвлөн “Элдэв Эрдэнэт” хэмээх могой жилээ угтаж буй талаараа ярилаа.

Газар тариалангийн салбарт техник технологийн шинэчлэлийг амжилттай нэвтрүүлэн, хүн амыг эрүүл, чанартай хүнсээр хангах үйлсэд бодитой хувь нэмрээ оруулан ажиллаж байгаад танай гэр бүл, хамт олонд талархал илэрхийлье.

2016 оноос хойш Жаргалант сумаас маань тасралтгүй улсын аварга тариаланч төрж байна.

Та бүхэндээ XVII жарны модон могой жилдээ арвин их ургацтай, амжилт бүтээлээр дүүрэн байхын өлзийтэй ерөөл өргөе.