Орхон аймгийн Цагдаагийн газрын Гэрээт цагдаагийн хэлтсээс 2025 оны 4-р сарын 3-ны өдөр алба хаагчдын мэдлэг, ур чадварыг дээшлүүлэх, хүний эрхийн талаар ойлголт өгөх сургалт зохион байгууллаа. Энэхүү сургалт нь цагдаа, дотоодын цэргийн байгууллагын 2025 оны “Хамтдаа хөгжье” зорилтын хүрээнд хийгдэж буй үйл ажиллагааны нэг хэсэг юм.

Сургалтад гэрээт цагдаагийн 29 алба хаагч хамрагдсан бөгөөд дараах үндсэн сэдвүүдийг хамарсан байна: Хүний эрхийн тухай ойлголт, мөн чанар Иргэдийн тэгш эрхийг дээдлэх зарчим Олон улсын хүний эрхийн стандарт ба Монгол Улсын эрх зүйн орчин Хүний халдашгүй, чөлөөтэй байх эрх Тус сургалтыг Орхон аймгийн Хүний эрхийн комиссын төлөөлөгчтэй хамтран зохион байгуулсан бөгөөд сургалтаар хүний эрхийг хамгаалах хууль, эрх зүйн зохицуулалтын талаар дэлгэрэнгүй мэдээлэл өгчээ.

Сургалтын ач холбогдлын талаар холбогдох албаны хүмүүс “Цагдаагийн алба хаагчид хууль эрх зүйн мэдлэгээ сайжруулснаар иргэдийн эрхийг хангах, хүний эрхийг хамгаалах үйл ажиллагаандаа илүү хариуцлагатай, мэргэжлийн түвшинд хандах боломж бүрдэнэ” хэмээн онцолж байлаа.

 Цаашид энэхүү чиглэлийн сургалтыг тогтмолжуулах, алба хаагчдын мэргэжлийн ур чадварыг тасралтгүй хөгжүүлэх чиглэлээр шат дараалсан арга хэмжээнүүдийг хэрэгжүүлэхээр төлөвлөжээ.