Канад Улсын Ванкувер хотноо зохион байгуулагддаг TED арга хэмжээ нь дэлхийн шилдэг сэтгэгчид 18 минутад багтаан өөрсдийн үнэ цэнтэй санаагаа хүргэдэг талбар юм. TED-ийн гол зорилго гайхалтай, үнэ цэнэтэй санаануудыг дэлхий нийтэд нээлттэй түгээх, хуваалцахад оршдог. TEDx бол дэлхийн томоохон хотуудад бие даан зохион байгуулагддаг арга хэмжээ бөгөөд TED-ийн үзэл санааны салшгүй нэг хэсэг юм.
Хойд бүсийн хөгжлийн төвийн залуус АНУ-ын TED олон улсын байгууллагаас албан ёсны зөвшөөрөл авсны хүрээнд 2024 оны 5 сарын 11-ний өдөр TEDxErdenet “Inspire the North” арга хэмжээг Эрдэнэт хотноо зохион байгуулах гэж байна.
Хойд бүсэд 2022 оны сүүлийн байдлаар 18-40 насны 100,844 залуучууд бүртгэлтэй байгаа бөгөөд дийлэнх нь бүс нутагтаа амьдарч байна.
Бүсдээ энэхүү арга хэмжээг зохион байгуулснаар залууст урам зориг өгөх, дэлхийд танигдсан арга хэмжээний тайзан дээр үнэ цэнтэй санаагаа хүргэх боломж нээгдэх ач холбогдолтой юм.
