Барилгачдын талбай чөлөөлж залуусын чөлөөт цагаа өнгөрүүлэх талбай болгох талаар аймгийн Засаг дарга М.Түмэнжаргал хэлж байсан юм. Тэгвэл энэхүү талбайг Эрдэнэтийн залуус нэгдэж “Эрдэнэтэд кемп” байгуулах төслийг Засаг даргад танилцуулсан байна.  Ингэхдээ Өндөрлөг, Барилгачдын талбайг тохижуулж гэрэлтүүлэг, хоол үйлдвэрлэлийн жишиг павильонуудыг тэд өөрсдийн хөрөнгөөр байгуулах гэнэ. Эрдэнэтэд энэ төрлийн үйлчилгээ явуулдаг иргэд, аж ахуй нэгжүүдэд хямд түрээсийн нөхцөлтэй гэрээ байгуулан иргэдэд чанартай халуун хоол, кофе шоп, үзвэр үйлчилгээ, бараа бүтэгдэхүүн борлуулах гэх мэт олон төрлийн шинэлэг үйлчилгээг нэг дор төвлөрүүлэх зорилготой юм. 
Орон нутгийн онцлогоос хамааран томоохон сүлжээ хоолны газрууд франчайз хийх боломж хомс, үйлчилгээ явуулах том талбай бүхий объект, газар байхгүй. Тиймээс Эрдэнэтийн хоол үйлдвэрлэл, үйлчилгээний салбарт ажиллаж буй хүн бүртэй хамтран ажиллаж, шинэ соёлыг нэвтрүүлэхэд гар бие оролцохыг санал болгож байгаа нь энэхүү төслийн давуу тал болох юм. Төслийн зураг төсөв хийгдэж дууссаны дараагаар тодорхой ажлуудыг төслийн багынхантай ярилцахаар болсон гэдгийг Орхон аймгийн засаг дарга М.Түмэнжаргал хэлж байна.