Шар усны үер болон үерийн аюулаас урьдчилан сэргийлэх ажлын хүрээнд холбогдох мэргэжилтнүүд газар дээр нь ажиллаж, нөхцөл байдлыг үнэллээ. Тус ажилд Онцгой байдлын газрын Гамшгаас хамгаалах улсын хяналтын ахлах байцаагч, Баян-Өндөр сумын мэргэжилтнүүд, Хот тохижуулах газрын замын инженер, хотын инженерийн хийцлэлтэй байгууламж хариуцсан мэргэжилтнүүд хамтран оролцсон байна. Энэ үеэр үерийн хамгаалалтын бетон далан, байгалийн гуу, суваг шуудуунуудад үзлэг хийж, хог, шороо дүүрсэн хэсгүүдийг тодорхойлжээ. Тодорхойлсон газруудад цэвэрлэгээ хийх шаардлагатайг онцолж, нийтийн их цэвэрлэгээ зохион байгуулахаар төлөвлөж байна. Иргэдийг шар усны үерийн эрсдэлээс сэргийлж, суваг шуудуу, ус зайлуулах хоолойд хог хаяхгүй байхыг анхааруулж байна.
