Орхон аймаг “Хог хаягдлын менежментийг сайжруулах” хөтөлбөрийг 2022- 2025 онд үндсэн гурван зорилтын хүрээнд хэрэгжүүлж байна. Тус төслийн хүрээнд иргэдийг соён гэгээрүүлэх, хог хаягдлын тогтвортой хөгжлийн боловсрол олгох чиглэлээр сургалт зохион байгуулсан бол авто машин механизмын парк шинэчлэлтийг хийх, хог хаягдлыг ангилан ялгах таталт хэвшүүлэх гэх мэт олон талт ажлуудыг хийж хэрэгжүүлж байгаа билээ. Үүний хүрээнд 2023 оны арванхоёрдугаар сарын 29-нд орон нутгийн төсвийн 2,3 тэрбум төгрөгийн хөрөнгө оруулалтаар ХТГ- т шинэ автомашин болон тоног төхөөрөмж гардуулан өгсөн. Үүний үр дүнд Дэнж, Яргуйт, Баянбулаг, Баян-Овоот багуудаас бусад багт чингэлгээр хог татан авалтыг хийж байна.
Чингэлэг байршуулах ажлыг манай аймгийн хэмжээнд 2022 оноос эхэлж 44 чингэлэг 4 автомашин худалдан авч байсан бол өнгөрсөн онд буюу 2023 онд 65 чингэлэг 7 автомашинаар парк шинэчлэлт хийжээ. Ингэснээр хог татан авалтын тоог нэмэгдүүлэх, илүү хурдан шуурхай ачиж тээвэрлэх, гудамжны хог хаягдал бий болохгүй байх гэх мэт олон талт ач холбогдол бий болж байгаа юм.