Улсдаа анх удаа сумын хөрөнгө оруулалтаар 150 хүүхдийн “Баян-Өндөр” цэцэрлэг ашиглалтад орлоо. Уг цэцэрлэгт Чандмань, Найрамдал багийн буюу Эко хороолол, Аз хотхон, Надежда, Их хаадын цуваа хороолол болон “Найрамдал”-ын 49-53-р гудамжинд оршин суугчдын хүүхдүүд суралцана. Баян-Өндөр сумын Орон нутгийн хөгжлийн сангаас 2.8, аймгийн төсвөөс 1.1 тэрбум төгрөгийн хөрөнгө оруулалт хийсэн. Цэцэрлэг ашиглалтад орсноор 27 ажлын байр бий боллоо.
Цэцэрлэгийн нээлтийн үйл ажиллагаанд УИХ-ын гишүүн Д.Батлут, Засаг даргын орлогч М.Түмэнжаргал, ИТХ-ын дарга Д.Мөнхбат, БӨ сумын Засаг дарга Б.Баасансүрэн, БӨ сумын ИТХ-ын дарга Э.Эрдэнэбат болон сумын төлөөлөгчид хүрэлцэн ирсэн юм. Орон сууцны хорооллууд ихээр нэмэгдэж байгаатай холбоотойгоор цэцэрлэг сургуулийн хүртээмжийн асуудал яригдаж байдаг гэдгийн Баян-Өндөр сумын ИХТ-ын дарга Э.Эрдэнэбат хэлж байна. Шинэ суурьшлын бүс болох 7А болон 7-р хорооллын хүүхдүүдэд харъяаллын дагуу цэцэрлэг шаардлагатай байсан учраас Баян-Өндөр сумын ИТХ-аас төсвийг нь шийдвэрлэж ийнхүү шинэ цэцэрлэг хүүхдүүдээ хүлээн авах бэлэн болсон байна. “Хамгийн сайн сургууль, цэцэрлэг бол гэртээ ойр байдаг сургууль, цэцэрлэгийг хэлнэ” гэдгийг тэрээр онцлов. Засгийн газрын шийдвэрээр 960 хүүхдийн сургууль, 180 хүүхдийн цэцэрлэг баригдахаар төлөвлөж байна.