Баян-Өндөр сумын удирдлагын түвшинд ёс зүйн доголдол гарч буй талаар иргэд, эх сурвалжууд мэдээлсээр байна. Энэ асуудлаас үүдэн удирдлагын хариуцлага, төрийн албаны сахилга бат суларч магадгүй гэсэн болгоомжлол олон нийтийн анхаарлыг татаж буй.  УИХ-ын гишүүн, Батлан хамгаалахын сайд Д.Батлутыг аймгийн Засаг даргаар ажиллаж байх хугацаанд туслахаар ажиллаж байсан, өдгөө Баян-Өндөр сумын Засаг даргаар ажиллаж буй Б.Мөнхбаярт ажлын хариуцлага, албан тушаалын ёс зүйн зөрчил байж болзошгүй талаарх мэдээллийг уншигч та бүхэнд хүргэж байна. Сүүлийн үед, намын дотоод ажилд албан тушаалаараа нөлөөлөх,залуу гишүүдийн дунд үл ойлголцол үүсгэх, ажлын цагаар  архидан согтуурах байдал гаргасан гэв.  Өнгөрсөн 10 дугаар сарын байдлаар БӨ сумын Засаг даргын Тамгын газар болон багийн ажлын албаны гүйцэтгэлийг үнэлэхэд нийт 240 гаруй цагийн хоцрогдол бүртгэгдсэн байна. Энэ нь нэг ажилтны нэг сарын дундаж ажлын цагийг 160 гэж тооцоход 1.5 сарын ажлын цагтай тэнцэх хэмжээний хоцрогдол юм. Ингэснээр байгууллагын нийт ажлын гүйцэтгэл төлөвлөгөөнөөс үлэмж хоцорсон бөгөөд энэ хоцрогдол нь удирдлагын зохион байгуулалт, ажлын төлөвлөлт, хуваарилалт болон хяналтын тогтолцоонд сул тал байгааг илтгэж болох юм. 

Төрийн албаны тухай хуулийн 40.1–т төрийн албан хаагч нь, албан тушаалаа урвуулан ашиглахгүй байх, төрийн нэр хүндэд халтай үйлдэл гаргахгүй байх, олон нийтийн итгэлийг хүндэтгэх үүрэгтэй ба уг хуулийн 40.2.5–д, “Ажил үүргээ гүйцэтгэж байхдаа архидан согтуурахыг хориглоно” хэмээн тусгасан байдаг. “Засаг захиргаа, нутаг дэвсгэрийн нэгж, түүний удирдлагын тухай” хуульд сумын Засаг дарга нь, нутгийн удирдлагын байгууллагын хэвийн үйл ажиллагааг хангах, иргэдийн итгэлийг хүлээх ёс зүйтэй байх, төрийн бодлого, хууль тогтоомжийг шударгаар хэрэгжүүлэх үүрэгтэй хэмээдэг. Харин эдгээр заалтыг зөрчсөн нь тогтоогдвол:

- Ёс зүйн хорооны дүгнэлт,

- Сахилгын шийтгэл,

- Албан тушаалаас чөлөөлөх зэрэг хариуцлага оногдох боломжтой.

Орон нутгийн удирдлага бол иргэдийг төлөөлөн төртэй хамгийн ойр харилцаж байгаа хүн. Өөрөөр хэлбэл, албан тушаалтны ёс зүй, удирдлагын хариуцлага, шийдвэр зэрэг нь бүхэл бүтэн нэг сумын хөгжлийн хурдад хүчтэй нөлөө үзүүлдэг. Иргэд олон нийт улс төрийн намаас илүүтэй хувь хүнээс ёс зүй, шударга байдал, хариуцлага хүлээж байна. Залуучууд улс төрд хүч түрэн орж ирэхийн хэрээр ёс суртахууны шалгуур нь ч өндөрсөх ёстой гэдэг нь зүй ёсны хэрэг. “Биеэ засаад гэрээ зас, гэрээ засаад төрөө зас” хэмээсэн монгол ухаан өдгөө удирдлагаар ажиллаж буй хэн бүхэнд хамаатай. Баян-Өндөр сумын удирдлагын талаар гарч буй дээрх мэдээллүүд  холбогдох байгууллага нягталж тогтоох хүртэл иргэдийн анхаарал, хүлээлт үргэлжилнэ. Иймд Баян-Өндөр сумын ЗДТГ-ын үйл ажиллагаа болон удирдлагын иүвшинд хяналт, шалгалт хийх хэрэгтэй байна. Өөрийн давуу байдал, эрх мэдлээ ашиглан бусдын биед халдах, үг хэлээр доромжлох, ёс зүйгүй үйлдэл гаргаж байгаа нь улс төрийн албан тушаалтаны хувьд хуулийн хариуцлага хүлээх нь зүй ёсны хэрэг. 

МАН-д мэдлэг боловсролтой, ур чадвартай, боловсон хүчин дутмаг, намын шугамаар эрх мэдлээ урвуулан ашиглан хэлтэс албадад дарга нарыг холих, солих асуудал ил цагаандаа гарч тогоон дотроо тийрэлцэн нударга зөрүүлэх нь энүүхэнд болов. "Буруу хүмүүжүүлсэн хүүхэд бухын хүзүүнээс ч хатуу" гэдэг шиг МАН залуучуудад хүмүүжил дутагдаж байна.

Илгээх

Та сэтгэгдэл бичихдээ хууль зүйн болон ёс суртахууныг баримтална уу.